Kababla birlikdə istifadə olunan sousların düzgün seçilməməsi sağlamlığa mənfi təsir göstərə bilər. Foodinfo.az URA.RU saytına istinadla xəbər verir ki, həkim-diyetoloq Darya Rusakova bu mövzuda vacib məqamları açıqlayıb.
Mütəxəssisin sözlərinə görə, tərkibi kəskin fərqli olan sousların birlikdə istifadəsindən çəkinmək lazımdır. Xüsusilə turş və yağlı sousların qarışdırılması həzm sisteminə əlavə yük yaradır və mədə-bağırsaq fəaliyyətini çətinləşdirir. Bu cür uyğun olmayan birləşmələr qidanın mənimsənilməsini zəiflədir və narahatlıq yarada bilər.
Həkim bildirir ki, mayonez və ketçup kimi sousların birlikdə istifadəsi kababın kalori dəyərini xeyli artırır. Bu isə qaraciyər və mədəaltı vəzin üzərinə əlavə yük salır. Nəticədə həzm prosesi ağırlaşır və müxtəlif sağlamlıq problemləri meydana çıxa bilər.
Mütəxəssis əlavə edir ki, hazır alınan souslar da diqqətlə seçilməlidir. Bu məhsulların tərkibində çox vaxt artıq duz, şəkər, qoruyucu maddələr və rəngvericilər olur. Onların müntəzəm istifadəsi mədənin selikli qişasını qıcıqlandıra, bağırsaq mühitini poza və qastrit, kolit kimi xəstəliklərin yaranma riskini artıra bilər.
Həkim qeyd edir ki, sous alarkən tərkibində benzo və sorbin turşuları, həmçinin nişasta əsaslı qatqılar olan məhsullardan uzaq durmaq lazımdır. Nişasta özü zərərli sayılmasa da, maddələr mübadiləsində pozuntu olan insanlar üçün əlavə yük yarada bilər.
Qeyd olunur ki, kababla birlikdə daha sadə və təbii souslara üstünlük verilməsi sağlamlıq baxımından daha məqsədəuyğundur. Ev şəraitində hazırlanmış, tərkibi aydın olan souslar həm həzmi asanlaşdırır, həm də orqanizmin ümumi vəziyyətinə müsbət təsir göstərir.
