Kakao bir çox insan üçün uşaqlıq xatirələri ilə bağlı olsa da, düzgün hazırlandıqda sağlamlıq üçün əhəmiyyətli faydalar verə bilər. Foodinfo.az dietology.pro-ya istinadla xəbər verir ki, şəkərsiz və təbii kakao tozundan hazırlanan içki orqanizmə müsbət təsir göstərir. Mütəxəssislərin fikrincə, bu içki güclü antioksidantlarla zəngindir və iltihabi proseslərin azalmasına kömək edir. Antioksidantlar damar divarlarını qoruyur və aterosklerozun inkişaf riskini azalda bilər. Bu isə ürək-damar xəstəliklərinin, o cümlədən infarkt və insultun profilaktikasında mühüm rol oynayır.

Tərkibindəki flavonoidlər beyin fəaliyyətinə də müsbət təsir göstərir. Araşdırmalara görə, kakao yaşa bağlı yaddaş zəifləməsinin qarşısının alınmasına yardımçı ola bilər. Mütəxəssislər bildirirlər ki, bu içki əhval-ruhiyyəni yaxşılaşdırır və apatiyanın azalmasına dəstək verir. Bundan əlavə, kakao qaraciyər üçün də faydalı hesab olunur. Elmi tədqiqatlar göstərir ki, o, sirrozun inkişafını ləngidə bilər.

Xüsusilə virus hepatiti və alkoqolsuz yağlı qaraciyər xəstəliyi olan şəxslər üçün kakao müəyyən dərəcədə qoruyucu təsir göstərə bilər. Lakin bütün bu müsbət təsirlərin əldə olunması üçün içkinin düzgün hazırlanması vacibdir. Tövsiyə olunur ki, kakao şəkərsiz, şirinləşdiricisiz və südsüz qəbul edilsin. Həkimlər bu içkinin həftədə üç dəfədən artıq istehlak edilməməsini məsləhət görürlər.