Tərəvəzlər sağlam qidalanmanın əsasını təşkil etsə də, düzgün istehlak edilmədikdə onların faydası xeyli azalır. 

Foodinfo.az tərəvəz yeyərkən insanlar arasında ən çox rast gəlinən üç kritik səhvi təqdim edir:

1. Tərəvəzləri həddindən artıq bişirmək

Tərəvəzlərin çox bişirilməsi onların qida dəyərini ciddi şəkildə azaldır. Xüsusilə C vitamini, B qruplu vitaminlər və antioksidantlar yüksək temperaturda məhv olur. Bu, tərəvəzlərin həm dadını korlayır, həm də orqanizmə olan faydasını minimuma endirir. Tərəvəzlərin buxarda, qısa müddətdə və orta temperaturda bişirilməsi tövsiyə edilir.

2. Tərəvəzləri yağsız yemək

Bir çoxları arıqlamaq məqsədilə tərəvəzləri tamamilə yağsız qəbul edir. Lakin aparılan elmi araşdırmalar göstərir ki, A, D, E və K kimi yağda həll olan mühüm vitaminlərin orqanizm tərəfindən mənimsənilməsi üçün az miqdarda yağ mütləq lazımdır. Tərəvəz salatlarına 1 çay qaşığı zeytun yağı əlavə etmək tərəvəzin qida dəyərini artırır.

3. Tərəvəzləri tək növdə və az miqdarda istehlak etmək

Çoxları yalnız xiyar, pomidor və ya kələm kimi eyni tərəvəzləri təkrarlayır. Halbuki müxtəliflik qida balansının ən vacib hissəsidir. Fərqli rəngli tərəvəzlər fərqli vitamin və antioksidantlarla zəngindir. Hətta “rəngli boşqab qaydası” adlanan prinsiplə gün ərzində yaşıl, narıncı, qırmızı və bənövşəyi tərəvəzlərdən qarışıq istehlak etmək tövsiyə olunur.

Bu üç sadə səhvdən qaçmaqla tərəvəzlərin qida dəyərini dəfələrlə artıra bilərsiniz.