Gündəlik qidalanmada çaydan tez-tez istifadə edilməsi bəzi hallarda orqanizm üçün gözlənilməz nəticələr yarada bilər. Foodinfo.az RIAMO-ya istinadən xəbər verir ki, qastroenteroloq, tibb elmləri namizədi Yekaterina Kaşux güclü çayın qidalardan dəmirin mənimsənilməsinə mənfi təsir göstərə biləcəyini açıqlayıb. Mütəxəssisin sözlərinə görə, xüsusilə güclü dəmlənmiş çay dəmirin bağırsaqlardan sorulmasını zəiflədir.

Bu səbəbdən dəmir çatışmazlığı olan insanlara çaydan istifadə zamanı diqqətli olmaq tövsiyə olunur. Həkim bildirib ki, dəmir çatışmazlığı anemiyası olan şəxslər çayı ya ümumiyyətlə məhdudlaşdırmalı, ya da yeməkdən dərhal sonra içməməlidirlər. Onun fikrincə, çayı qida qəbulundan iki-üç saat sonra içmək daha məqsədəuyğundur. Kaşux qeyd edib ki, güclü çayın tərkibində çoxlu miqdarda taninlər mövcuddur. Bu maddələr dəmir ionları ilə birləşərək onların orqanizm tərəfindən mənimsənilməsini çətinləşdirir.

Mütəxəssis əlavə edib ki, taninlər mədə-bağırsaq sisteminin hərəkətliliyini də ləngidə bilər. Eyni zamanda güclü çay mədədə duz turşusunun ifrazını artırır. Bu hal bəzi insanlarda mədə narahatlığı və həzm problemlərinə səbəb ola bilər. Həkim vurğulayıb ki, balanslı qidalanma zamanı içkilərin seçimi də qida maddələrinin mənimsənilməsində mühüm rol oynayır. Onun sözlərinə görə, xüsusilə dəmirə ehtiyacı olan şəxslər bu cür məqamları nəzərə almalıdırlar.