Zeytun yağı minilliklərdir qidalanmada mühüm yer tutur və bu gün də sağlam həyat tərzinin ayrılmaz hissəsi hesab olunur. Düzgün seçilmiş zeytun yağı həm faydası, həm də yeməklərə qatdığı dad ilə fərqlənir. Foodinfo.az BB.LV saytına istinadla xəbər verir ki, mütəxəssislər zeytun yağı alarkən bir neçə vacib məqama diqqət yetirməyi tövsiyə edirlər.

Məlumata görə, zeytun yağının istehsalı və keyfiyyəti onun növündən birbaşa asılıdır. Avropa Zeytun Şurasının təsnifatına əsasən, ən çox yayılan üç əsas zeytun yağı növü mövcuddur. Onlardan biri “ekstra təmiz zeytun yağı”dır ki, bu yağ ilk soyuq sıxma üsulu ilə əldə olunur və tərkibində maksimum faydalı maddələri saxlayır.

Digər növ “təmiz zeytun yağı” sayılır. Bu yağın turşuluq səviyyəsi bir qədər yüksək olsa da, yenə də keyfiyyətli hesab olunur və zəngin ətrə malikdir. Üçüncü növ isə təmizlənmiş zeytun yağıdır ki, daha çox qızartmalar üçün uyğundur və neytral dada malikdir.

Mütəxəssislər bildirirlər ki, zeytun yağı seçərkən onun istehsal olunduğu ölkə də böyük əhəmiyyət daşıyır. Günəşli iqlim, münbit torpaq və əlverişli hava şəraiti zeytunun keyfiyyətinə müsbət təsir göstərir. Xüsusilə Yunanıstan, İspaniya və İtaliya bu sahədə tanınmış ölkələr sırasındadır.

Qeyd olunur ki, etiket üzərində olan keyfiyyət nişanları da diqqətdən kənarda qalmamalıdır. Məsələn, müəyyən bölgədə tam istehsal olunduğunu göstərən nişanlar məhsulun saflığını təsdiqləyir. Eyni zamanda, üzvi istehsalı bildirən işarələr zeytun yağının kimyəvi maddələrsiz hazırlandığını göstərir.

Zeytun yağı salatlardan tutmuş souslara, şirniyyatlardan isti yeməklərə qədər geniş istifadə olunur. Mütəxəssislər vurğulayırlar ki, zövqə və istifadə məqsədinə uyğun yağ seçmək həm sağlamlıq baxımından, həm də yeməklərin dadını artırmaq üçün vacibdir. Doğru seçim isə gündəlik qidalanmanı daha faydalı və ləzzətli edə bilər.