Uşaqlıqda bir çox insan mal qaraciyərinin dadını sevməsə də, bu subməhsulun faydası danılmazdır. Foodinfo.az BB.LV-yə istinadla xəbər verir ki, mal qaraciyəri yüksək qida dəyərinə malik olub gündəlik zülal tələbatının böyük hissəsini ödəyir və aktiv həyat tərzi üçün vacib olan amin turşuları ilə zəngindir.

Mal qaraciyərinin tərkibində A, C, D və B qrup vitaminləri, həmçinin kalsium, fosfor, maqnezium kimi makroelementlər, dəmir, sink və flüor kimi mikroelementlər mövcuddur. Məhsulun 100 qramında təxminən 130 kilokalori olması onu pəhriz saxlayanlar üçün də uyğun edir. Mütəxəssislər bildirirlər ki, mal qaraciyəri hamilə qadınlar üçün də faydalıdır, çünki toksikozun azalmasına, saç və dırnaqların möhkəmlənməsinə kömək edir.

Bu subməhsul görməni yaxşılaşdırır, qanın tərkibini zənginləşdirir, qanazlığı zamanı hemoqlobinin artmasına dəstək verir və sinir hüceyrələrini möhkəmləndirir. Lakin həddindən artıq istehlak edildikdə xolesterinin və sidik turşusunun artmasına səbəb ola bilər. Yaşlılar, artıq çəkidən əziyyət çəkənlər və ürək-damar problemləri olan şəxslərə isə qaraciyər məhdud miqdarda tövsiyə olunur.

Mal qaraciyəri qızardılaraq, bişirilərək və ya suda qaynadılaraq hazırlanır. Əsas məsələ istilik təsirinin müddətinə diqqət yetirməkdir. Uzun müddət bişirilən qaraciyər sərtləşir və dadını itirir. Qızartma ən geniş yayılmış üsul hesab olunsa da, fiquruna diqqət edənlər üçün bişirmə və buğda hazırlama daha məqsədəuyğundur.

Mütəxəssislər bildirirlər ki, qaraciyərin yumşaq alınması üçün ilk növbədə onun təzəliyinə diqqət yetirilməlidir. Keyfiyyətli mal qaraciyəri parlaq səthə malik, tünd qırmızı rəngdə, elastik və xoş, azca şirin qoxulu olur. Üzərində ləkələr, qurumuş hissələr və zədələr olmamalıdır.

Hazırlıq mərhələsində qaraciyər damar və pərdələrdən tam təmizlənməlidir. Pərdələrin asan soyulması üçün qaraciyəri qısa müddət qaynar suya salmaq və ya bir neçə dəqiqə dondurucuda saxlamaq məsləhət görülür. Acı dadın aradan qalxması üçün isə qaraciyər suda və ya süddə saxlanıla bilər. Süddə isladılan qaraciyər xüsusilə yumşaq olur.

Qızartma və ya bişirmə zamanı qaraciyərin nazik və eyni ölçüdə doğranması vacibdir. Bu, onun tez bişməsinə və şirəli qalmasına kömək edir. Qızartma müddəti adətən 8–10 dəqiqəni keçməməlidir, sousda bişirildikdə isə maksimum 15 dəqiqə kifayətdir. Duz isə bişirmənin sonunda əlavə edilməlidir.

Mütəxəssislərin fikrincə, bu sadə qaydalara əməl etməklə mal qaraciyərindən həm faydalı, həm də yumşaq və dadlı yeməklər hazırlamaq mümkündür.