Arıqlamaq istəyən bir çox insan müəyyən müddətdən sonra pəhrizi pozur və bunu iradə zəifliyi ilə əlaqələndirir. Lakin mütəxəssislər bildirir ki, problemin səbəbi daha dərində gizlənir.

Foodinfo.az Life.ru saytına istinadla xəbər verir ki, dietoloq Yuliya Kaşapova arıqlama zamanı “sınmalara” səbəb olan əsas amilləri açıqlayıb. Onun sözlərinə görə, bu hallar əksər hallarda psixoloji və fizioloji səbəblərlə bağlıdır.

Mütəxəssis qeyd edir ki, yanlış motivasiya ən əsas problemlərdən biridir. Yalnız xarici görünüş və ya sosial şəbəkələr üçün arıqlamaq uzunmüddətli nəticə vermir. Əvəzində sağlamlıq və yaxşı hiss etmək kimi daxili motivasiya daha davamlıdır.

Qidalanmanın monoton olması da risk yaradır. Daim eyni qidaları qəbul etmək həm qida çatışmazlığına, həm də güclü aclıq hissinə səbəb olur. Bu isə sonda pəhrizin pozulmasına gətirib çıxarır.

Stress də mühüm rol oynayır. Bu zaman orqanizmdə kortizol hormonu artır və şirin, yağlı qidalara meyil güclənir. Fiziki aktivlik və istirahət stressin idarə olunmasına kömək edə bilər.

Həkim vurğulayır ki, sevilən qidaların tam qadağan edilməsi də düzgün yanaşma deyil. Bu, psixoloji gərginlik yaradır və nəticədə insan daha çox yeməyə meyilli olur. Daha sağlam alternativlər seçmək tövsiyə edilir.

Həddindən artıq ac qalmaq və tez-tez “boşaltma günləri” etmək də əks təsir göstərir. Orqanizm bunu təhlükə kimi qəbul edir və daha çox enerji ehtiyatı toplamağa başlayır.

Bundan əlavə, böyük porsiyalar nəticəsində mədə genişlənə bilər və bu da daha çox yeməyə səbəb olur. Bəzi dərman preparatları da iştahanı artıraraq arıqlama prosesinə mane ola bilər.

Dietoloq sonda qeyd edir ki, arıqlama zamanı belə hallar normaldır və əsas məqsəd prosesi davam etdirməkdir. Balanslı yanaşma və özünə qarşı anlayışlı olmaq uğurun əsas açarıdır.