Sağlam qidalanmada ən kiçik detallara diqqət yetirmək böyük nəticələr verə bilər. Foodinfo.az xəbər verir ki, Rusiya Qidalanma, Biotexnologiya və Qida Təhlükəsizliyi Federal Tədqiqat Mərkəzinin Kliniki Qidalanma Klinikası nəzdində fəaliyyət göstərən gündüz stasionarının müdiri, terapevt, kardioloq və dietoloq Tatyana Zalotova “kp.ru”ya açıqlamasında qovrulmamış qoz-fındığın orqanizmə xüsusi faydası olduğunu deyib.
Mütəxəssis bildirib ki, qoz, badam və kətan toxumu kimi məhsullar tərkibindəki faydalı yağlar sayəsində bağırsaqlarda xolesterinin sorulmasının qarşısını alır. Bu xüsusiyyət ürək-damar sağlamlığı üçün əhəmiyyətli qoruyucu rol oynayır.
Zalotovanın sözlərinə görə, dəniz məhsulları da qida rasionunda xüsusi yer tutmalıdır: “Somon, siyənək və skumbriya omeqa-3 yağ turşuları ilə zəngindir və damar sağlamlığı üçün vacibdir”.
Bundan əlavə, yaşıl tərəvəzlər və meyvələr orqanizmə antioksidantlar, fol turşusu və kalium təmin edərək, həm ürəyin, həm də ümumi metabolizmin düzgün işləməsinə dəstək olur.
Ekspert qeyd edib ki, sağlam qidalanmada yağ seçimi də çox vacibdir: “Extra virgin zeytun yağı ‘pis’ xolesterinin səviyyəsini azaldır və ‘yaxşı’ xolesterini qoruyur”.
