Açıq halda satılan bitki çayları sağlamlıq üçün müəyyən risklər daşıya bilər, çünki onların mənşəyi, tərkibi və saxlanma şəraiti barədə dəqiq məlumat olmur.
Foodinfo.az xəbər verir ki, bu çaylar çox vaxt gigiyenik qaydalara riayət olunmadan toplanır, qablaşdırılır və satılır. Nəticədə, çayların üzərində toz, mikrob və hətta pestisid qalıqları ola bilər. Bu, xüsusilə həssas insanlar üçün allergik reaksiyalara və ya həzm problemlərinə səbəb ola bilər.
Açıq satılan bitki çaylarının düzgün qurudulmadığı və saxlanmadığı hallarda küf və toksinlər əmələ gələ bilər ki, bu da ciddi sağlamlıq problemləri yarada bilər.
Həmçinin bitki çaylarının keyfiyyətsiz olması onların faydalı təsirini azaldır.
Doza və istifadə qaydaları barədə məlumatın olmaması, xüsusilə bəzi xəstəliklərdən əziyyət çəkənlər və ya dərman qəbul edənlər üçün təhlükəli ola bilər.
Təhlükəsizlik baxımından sertifikatlı, qablaşdırılmış və etibarlı mənbələrdən alınmış bitki çaylarına üstünlük verilməsi məsləhətdir. Bu, həm sağlamlıq risklərini azaldır, həm də bitkilərin faydalarını maksimum dərəcədə əldə etməyə kömək edir.
