Siqaret çəkmək yalnız ağciyərlərə deyil, orqanizmin vitamin və mineral ehtiyatlarına da ciddi təsir göstərir. Tütün tüstüsündə olan zərərli maddələr bədənin bir çox faydalı maddəni daha sürətlə itirməsinə səbəb olur və bu da zamanla müxtəlif sağlamlıq problemlərinə yol açır.

Foodinfo.az xəbər verir ki, siqaret çəkən insanlarda xüsusilə C vitamini səviyyəsi daha aşağı olur. Bunun səbəbi siqaretin orqanizmdə sərbəst radikalları artırması və bədənin antioksidantlara daha çox ehtiyac duymasıdır. Nəticədə immun sistemi zəifləyir, yorğunluq və halsızlıq artır.

Bundan əlavə, siqaretin D vitamini, kalsium və maqnezium balansına da mənfi təsir etdiyi qeyd olunur. Bu vəziyyət sümük zəifliyi, diş problemləri və əzələ yorğunluğu riskini artırır. Uzun müddət siqaret çəkən insanlarda sümük əriməsi ehtimalının daha yüksək olduğu bildirilir.

Həmçinin B qrupu vitaminlərinin, xüsusilə B12 və fol turşusunun azalmasının sinir sistemi və beyin fəaliyyəti üçün mənfi nəticələr doğura biləcəyi vurğulanır. Bu çatışmazlıqlar diqqət zəifliyi, əsəbilik və yaddaş problemləri ilə özünü göstərir.

Həkimlər sağlam qidalanmanın, bol su içməyin, meyvə-tərəvəz istehlakının artırılmasının və siqaretdən uzaq durmağın vitamin-mineral balansını qorumaq üçün vacib olduğunu bildirirlər.