Fındığı qovurduqda qida dəyərində müəyyən dəyişikliklər baş verir. Yüksək temperatur fındığın bəzi vitamin və antioksidantlarını azaltsa da, məhsul ümumi faydasını qoruyub saxlayır.

Foodinfo.az xəbər verir ki, qovrulma prosesi xüsusilə E vitamini və B qrup vitaminlərinin miqdarında azalma yaradır.

Həmçinin, fındığın tərkibindəki yağ turşularında oksidləşmə baş verdiyindən antioksidant səviyyəsinin müəyyən dərəcədə aşağı düşə bilər.

Bununla yanaşı, ekspertlər qovrulmuş fındığın bəzi üstünlüklərinə də diqqət çəkirlər. Belə ki, qovrulma prosesi çərəzin həzmini asanlaşdırır, dad və aromanı gücləndirir, eyni zamanda mikrob və küf riskini azaldır.

Sağlam şəkildə istehlak üçün fındığın aşağı temperaturda – 120–150°C-də yüngül qovrulması tövsiyə edilir. Bu üsul həm təhlükəsizliyi artırır, həm də qida dəyərinin böyük hissəsini qorumağa imkan verir.