Son illərdə sağlam qidalanmaya maraq artdıqca şəkərdən imtina etmək istəyən insanların sayı da çoxalıb. Lakin bir çox insan şirniyyata olan güclü istəyi səbəbindən bu prosesi yarımçıq qoyur. 

Foodinfo.az xəbər verir ki, bu vərdişdən birdən-birə deyil, tədricən və planlı şəkildə uzaqlaşmaq daha effektiv nəticə verir.

1. Şirniyyatı birdən-birə kəsməyin

Qidalanma üzrə mütəxəssislərin fikrincə, bədəni və beyni şəkərdən bir anda uzaqlaşdırmaq əzələ zəifliyi, yorğunluq və əsəbilik yarada bilər. Bunun əvəzinə, şəkərin miqdarını mərhələli şəkildə azaltmaq tövsiyə olunur.

2. Təbii alternativlərdən istifadə edin

Şəkər əvəzinə bal, xurma püresi, steviya və ya meyvə şirəsi kimi təbii şirinləşdiricilərdən istifadə etmək orqanizmi tədricən alışdırır. Məsələn, çaya şəkər əvəzinə bir az darçın və ya vanil əlavə etmək həm ləzzəti qoruyur, həm də iştahanı azaldır.

3. Duyğusal aclığı tanıyın

Bir çox insan şirniyyatı aclıqdan deyil, emosional səbəblərlə – stres, darıxma və ya narahatlıq zamanı yeyir. Belə hallarda qısa gəzinti, su içmək və ya diqqəti yayındıran fəaliyyətlər şirniyyat istəyini azalda bilər.

4. Zülal və liflə zəngin qidalar yeyin

Gündəlik menyuda yumurta, badam, yulaf və tərəvəzlər kimi toxluq yaradan məhsullara yer vermək qan şəkərini sabit saxlayır və qəfil şirin istəklərinin qarşısını alır.

5. Yuxusuzluq və stresə diqqət edin

Tədqiqatlar sübut edib ki, yuxusuzluq və stres orqanizmdə şəkər istəyini artıran hormonların ifrazını gücləndirir. Buna görə də kifayət qədər yuxu və istirahət şəkərdən uzaqlaşma prosesində mühüm rol oynayır.

Şəkərdən imtina qadağa deyil, həyat tərzi dəyişikliyidir. Əgər proses mərhələli şəkildə aparılarsa, orqanizm bir müddət sonra şirniyyata olan asılılığı itirir və enerji səviyyəsi təbii şəkildə yüksəlir.