Kərəviz suyu antioksidant və iltihabəleyhinə təsirləri ilə qaraciyər üçün olduqca faydalı hesab olunur. Foodinfo.az xəbər verir ki, ABŞ-ın Klivlend Klinikasının dietoloqu Dr. Marissa Ellis kərəvizin tərkibindəki luteolin və apigenin maddələrinin qaraciyərdə toksinlərin neytrallaşmasını sürətləndirdiyini bildirib.
O qeyd edir ki, xüsusilə səhərlər acqarına içilən təbii kərəviz suyu öd axımını tənzimləyir, qaraciyər fermentlərinin balansını qoruyur. Bu isə həm ümumi həzm sisteminə, həm də maddələr mübadiləsinə müsbət təsir göstərir.
Kərəviz suyunun su balansını tənzimləməsi bədəndə ödemin azalmasına kömək edir. Eyni zamanda qan şəkərinin stabil qalmasına yardımçı olur. Dr. Ellis vurğulayır ki, təbii şəkildə hazırlanmış, heç bir qatqı və duz əlavə olunmayan kərəviz suyu daha faydalıdır. Onun sözlərinə görə, bu məhsul təkcə qaraciyər deyil, həm də dərinin parlaqlığını artırmaq və immun sistemini gücləndirmək üçün faydalıdır.
Mütəxəssislər həftədə ən azı 3 dəfə bir stəkan kərəviz suyu içməyi tövsiyə edirlər.
