Hamiləlikdə qan azlığı, yəni anemiya ana və körpə üçün bir sıra sağlamlıq problemlərinə səbəb ola bilər. Foodinfo.az xəbər verir ki, əsasən dəmir və fol turşusu çatışmazlığı nəticəsində yaranan bu vəziyyət ciddi izlənilməli və müalicə edilməlidir.
Anemiya anada halsızlıq, yorğunluq, başgicəllənmə, hətta ürək döyüntülərində sürətlənməyə səbəb olur.
Qan hüceyrələrinin azlığı bədənin oksigenlə təminatını azaldır, bu da ananın gündəlik fəaliyyətlərinə təsir göstərir. Həmçinin, immunitet sistemini zəiflədərək infeksiyalara qarşı həssaslığı artırır.
Körpə üçün isə anemiya daha ciddi risklər yarada bilər. Dəmir çatışmazlığı plasentadan oksigen və qida maddələrinin ötürülməsini çətinləşdirir. Bu, körpənin çəkisinin aşağı olması, vaxtından əvvəl doğulma və ya doğuş zamanı problemlərin yaranması ilə nəticələnir.
Hamiləlikdə ağır anemiya körpənin beyin və sinir sisteminin inkişafına da mənfi təsir göstərir.
Qan azlığının qarşısını almaq üçün hamilə qadınlar qidalanmaya xüsusi diqqət yetirməlidir.
Dəmir baxımından zəngin qidalar – qırmızı ət, ispanaq, paxlalılar və quru meyvələr, həmçinin fol turşusu ilə zəngin qidalar mütləq qidalanmaya daxil edilməlidir. Lazım gələrsə, həkim nəzarəti ilə dəmir və fol turşusu əlavələri də qəbul edilməlidir.
Hamiləlikdə müntəzəm qan analizləri anemiyanın erkən diaqnozu və müalicəsi üçün vacibdir. Bu, həm ananın, həm də körpənin sağlamlığını qorumağa kömək edər.
