Günümüzdə sürətli həyat tərzi insanları tez hazır olan qəhvələrə yönəldir. Foodinfo.az xəbər verir ki, Sports.kz-ə istinadən, həll olunan qəhvə xüsusilə populyardır, çünki onun hazırlanması üçün sadəcə isti su kifayətdir.

Ekspertlərin məlumatına görə, həll olunan qəhvə istehsal prosesində yüksək temperatur və təzyiqə məruz qalır, bu isə onun kimyəvi tərkibini dəyişdirir. Belə qəhvə tərkibində:

• xlorogen turşusu və antioksidantlar azdır,

• N-metilpiridiniya kimi iltihab əleyhinə maddələr azalır,

• akrilamid və oksalatlar isə daha çoxdur, bu da böyrək daşı yaranma riskini artırır.

Müqayisə üçün: 100 qram dəmlənmiş qəhvədə təxminən 657 mq fenolik birləşmələr mövcuddur, həll olunan qəhvədə isə yalnız 151 mq olur.

Bəzi həll olunan qəhvə paketləri əlavə şəkər, süd qatqıları, doymuş yağ və konservantlar da ehtiva edə bilər ki, bu da əlavə kalori və şəkər mənbəyi olur.

Həll olunan qəhvə müəyyən hallarda riskli ola bilər:

• böyrək daşı olanlar,

• insulin müqaviməti və ya prediabeti olanlar,

• qaraciyər problemləri yaşayanlar,

• akrilamidlə bağlı onkoloji riskləri nəzərdən keçirənlər.

Qəhvə gündəlik istehlak oluna bilər, əgər kofeinə qarşı həssaslıq yoxdursa və yan təsirlər müşahidə olunmursa. Eyni zamanda, onu günün ilk yarısında içmək tövsiyə edilir ki, yuxuya təsiri olmasın.